Жалал-Абад эл аралык университетине имплантологиялык технологиялар тармагында иш алып барган Корея Республикасындагы SeohanCare компаниясынын делегациясы келди.
Визиттин алкагында компаниянын өкүлү — эл аралык сатуу бөлүмүнүн директору Квон Ёнхо университеттин жана Shifaa Clinic клиникасынын жетекчилиги менен жумушчу жолугушуу өткөрдү.
Жолугушуунун жүрүшүндө тараптар медицина, билим берүү жана практикалык саламаттык сактоо тармагындагы эл аралык кызматташтыкты өнүктүрүү мүмкүнчүлүктөрүн талкуулашты. Өзгөчө көңүл заманбап медициналык технологияларды киргизүүгө, кесиптик тажрыйба алмашууга, ошондой эле биргелешкен билим берүү жана клиникалык долбоорлорду ишке ашыруу маселелерине бурулду.
Ошондой эле катышуучулар Жалал-Абад эл аралык университетинин клиникалык базасынын мүмкүнчүлүктөрүн кеңейтүү боюнча маселелерди карашты. Бул багыттарды өнүктүрүү медициналык кызматтардын сапатын жогорулатуу, студенттердин практикалык даярдыгын өркүндөтүү жана медициналык мекемелердин ишине инновациялык чечимдерди киргизүү үчүн маанилүү болуп саналат.
Чет элдик компаниялар жана медициналык уюмдар менен кызматташуу билим жана тажрыйба алмашууга, заманбап технологиялар менен таанышууга жана эл аралык тажрыйбаны клиникалык практикада колдонууга жаңы мүмкүнчүлүктөрдү ачат.
Жолугушуунун жыйынтыгында тараптар өнөктөштүк мамилелерди мындан ары өнүктүрүүгө өз ара кызыкдар экендиктерин билдиришип, биргелешкен демилгелерди ишке ашыруу боюнча пландарды белгилешти.
Жалал-Абад эл аралык университети эл аралык байланыштарды чыңдоону, клиникалык базаны өнүктүрүүнү жана медициналык билим берүү менен практикалык саламаттык сактоого заманбап технологияларды киргизүү үчүн шарттарды түзүүнү улантат.