2025-жылдын 10-ноябрында Жалал-Абад эл аралык университетинде Кыргыз Республикасынын Илим күнүнө арналган «МЕДИЦИНАДАГЫ ПЕРСПЕКТИВАЛАР. XXI КЫЛЫМ» аттуу I студенттик илимий-практикалык конференция өттү. Конференция жаш изилдөөчүлөр, студенттер жана окутуучулар үчүн медицина жана ага чектеш тармактар боюнча илимий тажрыйба алмашуунун аянтчасы болду.

Конференцияга И.К. Ахунбаев атындагы Кыргыз мамлекеттик медициналык академиясынын, Ош эл аралык медициналык университетинин, Борбор Азия эл аралык медициналык университетинин, Жалал-Абад эл аралык университетинин студенттери, магистранттары, жаш окумуштуулары жана окутуучулары, ошондой эле чет өлкөлүк жогорку окуу жайларынын өкүлдөрү катышты.

Студенттик илимий баяндамалар төмөнкү багыттар боюнча угулуп, талкууланды:

1. Гуманитардык илимдер жана медициндагы маалыматтык технологиялар
2. Медициналык практикага инновациялар жана жасалма интеллектти киргизүү
3. Медициналык фундаменталдык изилдөөлөрдүн заманбап багыттары
4. Коомдун туруктуу өнүгүшү үчүн XXI кылымдагы медициналык билим берүүдөгү междисциплинардык ыкмалар

Конференциянын алкагында 50дөн ашык илимий докладдар угулуп, талкууланды. Баяндамаларда азыркы медицинанын, цифралык технологиялардын жана междисциплинардык изилдөөлөрдүн актуалдуу маселелери камтылды.

Конференциянын бардык катышуучуларына катышуучу сертификаттары ыйгарылып, мыкты баяндама жасаган студенттер I, II жана III даражадагы Дипломдор менен сыйланышты.

Секциялык жыйынтыктардын негизинде конференциянын резолюциясы кабыл алынды:

1. «Медициндагы перспективалар. XXI кылым» аттуу студенттик илимий-практикалык конференцияны жыл сайын өткөрүлүүчү салттуу илимий аянтча катары улантуу.
2. Студенттердин илимий долбоорлоруна илимий жетектөөнү жана колдоону күчөтүү.
3. Медициналык билим берүү жана илим жаатында эл аралык кызматташууну кеңейтүү.
4. Университеттин базасында окуу процессине жана илимий изилдөөлөргө инновациялык ыкмаларды активдүү киргизүү.
5. Эң мыкты студенттик докладдарды Eurasian Journal of Science and Medicine Research (EJSMR) эл аралык илимий журналында жарыялоого сунуштоо.

Конференциянын уюштуруу комитети бардык катышуучуларга жана жогорку окуу жайларынын илимий жетекчилерине активдүү катышуусу, жогорку илимий деңгээлдеги докладдары жана студенттик илимдин өнүгүшүнө кошкон салымы үчүн ыраазычылык билдирет.

Кыргыз Республикасынын Илим күнү кут болсун!