Жалал-Абад эл аралык университети (ЖАЭУ) эл аралык баштапкы (ex-ante) программалык аккредитациядан ийгиликтүү өтүп, Аккредитация жана рейтингдин көз карандысыз агенттигинен (НААР / Independent Agency for Accreditation and Rating, IAAR) сертификат алды.

Тышкы эксперттик баалоонун жыйынтыгында 560001 «Дарылоо иши» билим берүү программасы (деңгээли — адистик, окуу мөөнөтү — 5 жыл) аккредитацияланды. Чечим НААРдын Аккредитациялык кеңеши тарабынан 2025-жылдын 25-декабрындагы №99 протоколдун негизинде кабыл алынган.

Аккредитациялык сертификат 3 жылдык мөөнөткө берилди жана

2025-жылдын 25-декабрынан 2028-жылдын 24-декабрына чейин жарактуу.

Аккредитациянын жүрүшүндө эл аралык эксперттик комиссия билим берүү программасынын мазмунун, профессордук-окутуучулук курамдын потенциалын, ички сапатты камсыз кылуу системасын, окуу-усулдук жана ресурстук камсыздоону, ошондой эле билим берүү процессин ишке ашыруунун шарттарын комплекстүү түрдө баалады. Экспертизанын жыйынтыгында программа медициналык билим берүүнүн эл аралык сапат стандарттарына жооп берери тастыкталды.

Аккредитациядан ийгиликтүү өтүү ЖАЭУнун өнүгүүсүндөгү маанилүү этап болуп саналат, университеттеги билим берүү ишмердүүлүгүнүн жогорку деңгээлин тастыктайт жана бүтүрүүчүлөрдүн улуттук жана эл аралык эмгек рыногундагы атаандаштыкка жөндөмдүүлүгүн жогорулатат.

Жалал-Абад эл аралык университети билим берүүнүн сапатын жогорулатууга, илимий изилдөөлөрдү өнүктүрүүгө жана эл аралык академиялык кызматташууну кеңейтүүгө багытталган туруктуу өнүгүү стратегиясын мындан ары да ырааттуу ишке ашырат.