Урматтуу Жалал-Абад эл аралык университетинин профессордук-окутуучулук курамы, студенттер жана жалпы кызматкерлер!

Сиздерди кирип келе жаткан Жаңы жыл майрамыңыздар менен чын жүрөктөн куттуктайм!

Өтүп бараткан жыл окуу жай үчүн гана эмес, шаарыбыз, облусубуз, өлкөбүз үчүн да маанилүү жыл болду. Ар бирибиз үчүн жоопкерчиликке, эмгекке жана жаңы мүмкүнчүлүктөргө бай да жыл болду десем жаңылышпайм. Бул мезгил ар бирибизден чоң жоопкерчиликти, эмгекти жана ынтымакты талап кылды. Биз биргеликте билим берүү сапатын жогорулатууга, университеттин материалдык-техникалык базасын чыңдоого, илимий иштерди жандандырууга жана студенттик жашоону мазмундуу кылууга багытталган маанилүү иштерди аткардык.

ЖАЭУнун башкы максаты — заман талабына жооп берген, атаандаштыкка жөндөмдүү, кеңири дүйнө таанымы бар адистерди даярдоо. Бул жолдо ар бириңиздердин талыкпас эмгегиңиздер, демилгелүү сунуштарыңыздар жана ынтымактуу аракеттериңиздер университеттин өнүгүүсүнө чоң салым кошууда.

Жаңы жылыбыз берекелүү жана ийгиликтүү болсун! Ар бир үй-бүлөгө аманчылык, молчулук, бекем ден соолук жана бакыт каалайм. Студенттерибизге — мыкты окуу жетишкендиктерин, жаштарга мүнөздүү кыялдарды ишке ашырууну, профессордук-окутуучулук курамга — чыгармачылык шыктануу менен жаңы илимий ийгиликтерди, кызматкерлерге — иштериңиздерге туруктуулук жана өсүп-өнүгүүнү каалайм.

Жаңы жылда ЖАЭУнун эшиги билимге умтулган ар бир абитуриент үчүн кенен ачылып, университетибиздин аброю дагы да өсө берсин. Ынтымакта болуп, бир максат үчүн бирге аракет кылалы!

Жаңы жылыңыздар менен!

Жалал-Абад эл аралык университетинин ректору, физика –математика илимдеринин кандидаты, проофессор Нарбаев Мирсадык Рахимбердиевич