Үстүбүздөгү жылдын 13-декабрь күнү Жалал-Абад Эл аралык университетинде (ЖАМУ) улуу жазуучу Чыңгыз Айтматовдун туулган күнүнө карата “Чыңгыз Айтматов — адамзаттын үнү” аталышындагы адабий-агартуучулук иш-чара өткөрүлдү. Иш-чаранын негизги максаты — Айтматовдун чыгармалары аркылуу жаш муундун руханий дүйнөсүн байытуу, улуттук баалуулуктарды даңазалоо жана көркөм адабиятка болгон кызыгууну арттыруу.

Кече университеттин жетекчилигинин, профессордук-окутуучулук курамдын жана студенттердин катышуусунда өтүп, катышуучулар жазуучунун өмүр жолу, чыгармачылык мурасы жана дүйнөлүк адабияттагы орду тууралуу баяндамаларды угушту. Студенттер Айтматовдун чыгармаларынан үзүндүлөрдү көркөм окуп, залкар калемгер көтөргөн адамгерчилик, жоопкерчилик, мекенчилдик жана адеп-ахлак темалары боюнча өз ой-пикирлерин бөлүштү.

Уюштуруучулардын белгилешинче, мындай адабий-агартуучулук иш-чаралар студенттердин гуманитардык билим деңгээлин жогорулатып, улуттук маданиятка сый-урматты арттырууга жана коомдогу руханий биримдикти бекемдөөгө өбөлгө түзөт. ЖАМУда Айтматовдун мурасын даңазалаган иш-чаралар мындан ары да үзгүлтүксүз улантылмакчы.