2025-жылдын 30-апрелинде Жалал-Абад шаарындагы Эл аралык университетте Кыргыз Республикасынын Ички иштер башкармалыгынын (ИИБ) кызматкерлери жана Бишкек шаарынан келген Кыргызстан мусулмандарынын дин башкармалыгынын (Муфтият) өкүлдөрү менен маалыматтык жолугушуу өттү.

Жолугушуунун максаты – студенттерди, өзгөчө чет элдик жарандарды, Кыргыз Республикасындагы акыркы мыйзамдык өзгөрүүлөр менен тааныштыруу, коомдук тартип, коопсуздук жана көп улуттуу чөйрөдө тынч жашоонун маанилүүлүгүн баса белгилөө болду.

ИИБ тараптан катышкандар:
• Ажыкулов Бекжан Ташполотович
• Калдаров Урматбек Муктарович
• Сулайманов Улукбек Режавалиевич

Муфтияттан:
• Кайсарбаев Нурбек Жанарбекович

Жолугушууда Муфтияттын өкүлү коомдук жайларда бет жабууга тыюу салуу тууралуу мыйзамдагы акыркы өзгөрүүлөрдү түшүндүрүп берди. Бул талап Кыргыз Республикасында жашаган бардык жарандарга жана чет өлкөлүк жарандарга, аялдарга да, эркектерге да бирдей тартипте колдонулат. Аталган ченем коомдук коопсуздукту камсыздоо жана коомдо ачыктыкты сактоо максатында кабыл алынгандыгы белгиленди.

ИИБ кызматкерлери мыйзамдуулукту сактоонун жана улуттар аралык түшүнүшүүнү бекемдөөнүн маанилүүлүгүн белгилешти. Кыргызстан тышкы дүйнөдө болуп жаткан чыңалуу жана стабилдүүлүктүн бузулушу сыяктуу көрүнүштөрдүн өлкө ичиндеги коомдук жашоого таасир этпеши керектигин эскертишти. Биздин мамлекет ар дайым тынчтыкты, өз ара урматтоону жана этностор аралык ынтымакты колдоп келген.

Университеттин администрациясы кымбаттуу конокторго ыраазычылык билдирип, бардык студенттерди Кыргыз Республикасынын мыйзамдарын урматтоого, бул өлкөнүн маданиятына жана салттарына сый-урмат менен мамиле кылууга, ошондой эле академиялык чөйрөдө биримдикти жана түшүнүшүүнү чыңдоого чакырат.