2025-жылдын 27-мартында Жалал-Абад эл аралык университети (ЖЭАУ) Scientific Publications LLC компаниясы менен кызматташтык жөнүндө меморандумга кол койду. Бул компания — Чыгыш Европада жана Борбордук Азияда илимий изилдөөлөрдү, наукометриканы жана академиялык басылмаларды колдоону өзгөчө адистик катары өнүктүрүп келе жаткан алдыңкы уюмдардын бири.

Scientific Publications университеттердин, изилдөө мекемелеринин жана окумуштуулардын илимий аброюн жогорулатууга багытталган кеңири кызмат көрсөтүүлөрдү сунуштайт. Компания Scopus, Web of Science жана башка эл аралык наукометриялык маалымат базалары менен тыгыз кызматташат. Бул кызматташтык илимдин глобалдуу интеграциясына жана авторлордун эл аралык деңгээлде көрүнүктүүлүгүн жана цитатасын жогорулатууга өбөлгө түзөт.

Меморандум кызматташуунун төмөнкү багыттарын камтыйт:

1. Илимий конференциялар, семинарлар, вебинарлар жана билим берүү программаларын биргелешип уюштуруу.
2. Илимий жана билим берүү демилгелерин ишке ашыруу.
3. Наукометрия жана илимий аналитика тармагында кызматташуу.
4. Учурдагы жана келечектеги долбоорлор боюнча маалымат жана аналитикалык материалдар менен алмашуу.
5. Эл аралык журналдарда илимий макалаларды даярдоого жана жарыялоого колдоо көрсөтүү.

Бул өнөктөштүк ЖЭАУ үчүн академиялык өнүгүүгө жаңы мүмкүнчүлүктөрдү ачып, университеттин дүйнөлүк илимий коомчулуктагы ордун бекемдейт.